غزاله شهاب دعاء احمد 3

هند بجدية:بقولك ايه يا دوب نعمل السبوع بتاعها و بعدها فرحي بأسبوعين….

غزال بابتسامة و ارهاق :كنت خايفه اولد في وقت الفرح

هند:كنت هبقي زعلانه اوي بجد…. و بعدين علشان النونو يبقى معانا في الفرح و ناخد صور كتير اوي سوا.

غزال بابتسامة:
ان شاء الله يا هند بس خلينا نستنى نشوف الدكتورة هتقول ايه و بعدين يمكن مقدرش اخدها القاعة علشان هيبقى في ناس كتير و غلط عليه انها تبقى في مكان زحمه.

هند:أن شاء الله مش هيحصل و هتكون معانا و بعدين انتي خايف ليه ان شاء الله هتكون زي الفل و لا انتي خايفة علشان في الحضانة

غزال بتعب:خايفه بس! دا انا مرعوبة يا هند سبيني في حالي

هند:ماشي يا ستي… جدو عايز يشوفك هو من بدري و هو نفسه يشوفك بس الدكتورة قالت مينفعش الزحمة
و هو خاف عليكي أنا هخرج اخليه يدخل يطمن عليكي.

غزال ابتسمت بهدوء، هند سابتها و قامت دقايق و دخل الحج محمود و هو فرحان جداً و مبسوط

غزال اول ما شافته ابتسمت و هو دخل حضنها بحنان، بعد عنها و باس رأسها و هو مغمض عنيه، كان فرحان فرحان جدا

شاف حفيدته اللي كانت أجمل بكتير مما توقع، ملامحه بريئة و جميلة بشكل خلاه يدمع و قلبه يحن لاولاده الاتنين اللي ماتوا في حياته

كان البنوته دي هي حلقة الوصل بالنسبة له كان خايف و سعيد مشاعره اول مرة تتلغبط بالشكل دا

قعد جنب غزال و مسك ايدها بحنان و هو بيمسح دموعها

=متبكيش يا حبيبة جدك…. متبكيش لان الدموع وحشة اوي على عيونك الحلوين دول….
عارفة بنوتك زي القمر بدر… رغم أنها صغيرة لكن جميلة اوي
اقولك سر…. انا شفت ابوكي و عمك في المنام كانوا مبسوطين هتصدقيني لو قلتلك أني شفتهم الاتنين مبسوطين
أنا بكيت كتير اوي عليهم يا غزال… كنت خايف ابوكي يكون مات و هو زعلان مني…كنت طول عمري بقول يارب اديني اي إشارة انه سامحني على قسوتي عليه و اني كنت بفضل يونس عنه
بس امبارح اول مرة يجي لي في المنام بعد سنين طويله اوي اوي… كنت كل يوم بتعذب فيهم…
أمك يمكن غلطت بس أنا كمان غلطت في حقها
مكنتش بجيب ليها حقها من حليمة و قويت حليمة عليها كانت كل يوم تنام معيطه بسببي انا و حليمة
انا مش ببرر اللي عملته بس لازم كل واحد ياخد حقه و يقول اللي ليه و اللي عليه