هواها متيم لسماح نجيب 1
تبسم رفيق لوالدته قائلاً :
–:” لاء أعملها يا أمى لو هى استهترت علشان أنا أخوها أنا هبقى أخوها فى البيت فى الكلية دكتورها وبس”
فقال مالك متفكهاً :
–:” يا خسارة ريشك اللى نفشتيه على الفاضى يا رهف”
مد رفيق يده يحاوط كتفىّ شقيقته بمحبة ، فقربها منه فهو رأى علامات الإمتعاض على وجهها ، فطبع قبلة على رأسها وقال :
–:” حبيبة قلبى هتبقى شطورة وتقعد ساكتة فى المحاضرات وتسمع الكلام بس لحظة كده أنا أساساً مش بدرس لسنة اولى”
سألته والدته بدهشة :
–:” مش بدرس لأولى ليه مالهم هيعضوك يا رفيق”
سمع رفيق صوت ضحكة شقيقه مالك ، فخاطبه محذراً:
–:” بس يا ابنى أنت أكتم دلوقتى أنا برفض أدرس لأولى وكلهم فى الكلية عارفين كده بيبقوا لسه عايشين فى جو الثانوية وأنا مليش دماغ لكده”
مطت رهف شفتيها قائلة :
–:” ايه البخت ده بس برضه هدخل تجارة”
مسد رفيق على ذراعها قائلاً :
–:” اللى يريحك يا حبيبتى ده مستقبلك وأنتى أدرى بيه ”
أرتشفت منى من قدح القهوة خاصتها وهى تقول :
:” على فكرة إحنا معزومين على فرح يوم الخميس يا رفيق فرح ابن واحد من الجيران اللى جمبنا عزمونا على الفرح”
تبسم مالك قائلاً بمكر :
–:” أنتى متأكده إن إحنا معزومين ياماما مش حاجة تانية”
رمقته والدته بنظرة نارية ، فرفعت سبابتها بوجه قائلة :
– :” هش يا واد أنت وأسكت شوية تعرف ولا متعرفش
وضع مالك يده على فمه ، دليلاً على أنه سيلتزم الصمت ، ولكن رفيق قال بشئ من الضيق :
–:” يبقى أكيد يا أمى عيزانى أجى معاكى علشان تشوفيلى عروسة من الفرح مش كده”
قالت رهف ممازحة والدتها :
–” دى موضة ستيناتى أوى دى يا ماما”
زفرت منى من أنفها ، من تضيق الخناق عليها من أبناءها ، فهتفت بهم بشئ من الصرامة :
–:” فى ايه مالكم دا كله علشان قولت معزومين على فرح”
مسح رفيق وجهه براحتيه مغمغماً بصوت سمعته والدته :
–:” نفسى يا أمى تبطلى تفكير فى الموضوع ده أنا مش عايز أتجوز يا أمى مش عايز أتجوز”
حطت منى بيدها على رأسها وهى تقول :
–:” طب متفسرش فى وشى علشان كلامك ده بيتعبنى وبيرفع ضغطى لما أشوف أول فرحتى مش عايز يفرحنى بيه ولا يتجوز ولا أشوف ولاده قبل ما أموت”
ترك مالك مكانه وجلس على حافة مقعد والدته قائلاً بمزاح :
– :” شوفت أهى ماما دخلت فى دور أمينة رزق أهى يلا يا حاجة فاضل فقرة يعنى أشوف أخواتك اتجوزوا وأنت قاعد لوحدك كده من غير زوجة وعيال”
