هواها متيم لسماح نجيب 4

إبتسمت علية بوهن وقالت :
–:” الأمر لله فى حاجة يا أبنى عايزة اقولك عليها”

أنصت إليها رفيق بإهتمام وقال :
–:” اتفضلى يا حاجة علية قولى انا سامعك”

بللت علية شفتيها الجافتين وهى تقول:
–:” أنا عايزة بس اسألك الأول أنت متجوز ”

أجابها رفيق وهو يحرك رأسه سلباً:
– لاء يا حاجة علية مش متجوز بس خير بتسألى على الموضوع ده ليه

قالت علية وهى ترنو إليه بحنان :
–انا عيزاك تتجوز ليان حفيدتى”

عقد رفيق حاجبيه تعجباً من مطلبها ، فلماذا تريد منه أن يتزوج حفيدتها وهى فى الأساس لا تعرفه سوى من يوم واحد ؟ فكيف لها ان تثق به حتى يتزوجها ؟

فرد رفيق قائلاً بشئ من الدهشة :
–:” انتى بتقولى ايه يا حاجة علية ، اتجوز ليان ازاى وحضرتك بتطلبى منى كده وانتى متعرفنيش غير من يوم واحد ما يمكن انا انسان مش كويس أو يمكن أتعب حفيدتك معايا ، إزاى اصلا وثقتى فيا بالسرعة دى”

إبتسمت علية وقالت :
–:” انت يا ابنى باين عليك انك من اصل طيب وانك محترم واللى يصر يدفع فلوس اكتر علشان ضميره يبقى مستريح دا يبقى انسان شريف وبيخاف ربنا ، ثم أنا لما عرفت أن فى مشترى للأرض بتاعة إبنى ، كان لازم اسأل عليه وأعرف هو إنسان أمين ولا لاء ، فسألت السمسار وكمان خليت المحامى يسأل عليك قبل ما تيجى ، وعرفت أنك محترم ومن أصل طيب ، بس مكنتش أعرف أنت متجوز ولا لاء ، فعلشان كده سألتك ، ودلوقتى أنا عيزاك تتجوزها علشان تبقى واصى عليها لحد ما تبلغ سن ٢١ سنة وبعد كده لو مش حابب تكمل جوازك منها ممكن تسيبها بس علشان أمها وجوز أمها ميخدوهاش هى وأخوها لو أنا مت ”

فكر رفيق وتساءل :
–:” بس ليه امها متاخدهاش أظنها أنها احق بيها من اى حد تانى”

كسا الحزن وجه علية وهى تقول:
–:” انت متعرفش حاجة يا ابنى دى أمها كانت السبب فى موت ابوها”

رفع رفيق حاجبيه بدهشة بعد سماع ما قالته عليه ، فأراد أن يعرف المزيد ، فقال متسائلاً:
–:” السبب ازاى مش فاهم”

وضعت علية يدها على صدرها ، كأنها شعرت بوخز مفاجئ ، ولكن إستطاعت أن تقول :
–:” أنا أبنى كان عنده القلب والهام مراته عرفت فاروق اللى هو جوزها دلوقتى لما كانت لسه على ذمة ابنى ولما هو عرف وواجهها قالتله انها بتحب فاروق وعايزة تطلق وانها بتكرهه ومش عايزة تعيش معاه تانى وانها هترميله ولاده وهتسيبهمله ، ابنى مستحملش الصدمة جاتله ازمة قلبية مفاجئة ومات فيها وبعدين هى راحت اتجوزت اللى اسمه فاروق ده وهو راجل مش تمام دا حتى فاتح كباريه والراجل ده كنت بشوف فى عينيه نظرة الدناءة لليان وكل اللى ليان تعرفه ان جوز امها فاتح مطعم مش اكتر من كده وانت ليك انك تتخيل لو ليان عاشت مع راجل زى ده فى بيت واحد ايه اللى ممكن يحصل ليها وانها ممكن تضيع يا ابنى”