هواها متيم لسماح نجيب 4
قالت شيرى بغرابة :
–:” هو مين ده يا ماهى اللى عمالة تشتميه وعمل فيكى ايه مش فاهمة حاجة”
علا صوتها بنحيب :
–:” رفيق اتجوز يا شيرى اتجوز”
قطبت شيرى حاجبيها قائلة بغرابة:
:” اتجوز ازاى وامتى الكلام ده انتى مش كنتى بتقولى انه مسافر وتبقى مين مراته دى وعرفها منين”
حركت ماهيتاب رأسها دليلاً على عدم فهمها لسبب تلك الزيجة :
–:” معرفش يا شيرى كل اللى أعرفه أنه راجع متجوز وجايب مراته معاه ، حاولت اتقبل الموضوع مقدرتش ، لما روحتلهم أمبارح وشوفتهم داخلين من الجنينة الغيرة ولعت فى قلبى”
ردت شيرى قائلة بعدم إكتراث:
–:” طب انتى بتعيطى ليه ما يتجوز ولا ما يتجوزش انتى مالك بالموضوع”
نظرت لها ماهيتاب نظرة نارية وهى تقول:
–:” انتى بتقولي ايه يا شيرى ما انتى عارفة ان انا بحبه ازاى واحدة تانية تاخده منى ، تبقى مراته وتقوم وتنام وهو قدام عينيها تسمعه بيتكلم تشوفه وهو بيبتسم يقرب منها يبقى جوزها بجد وييجى يوم ويخلف منها ازاى ازااااى”
أجفلت شيرى من صوت صراخها ، فحاولت تهدئتها وهى تقول:
– :” خلاص بقى يا ماهى انسى الموضوع ده ده موضوع جنان من أوله ازاى اصلا تبقى مخطوبة لاخوه وبتفكرى فيه دى تبقى خيانة”
علت وتيرة أنفاسها بغضب ساحق وهى تقول:
– :” انتى عارفة انا مبحبش مالك محبتش غير البنى ادم اللى معندوش قلب ده اللى فضلت ده كله على امل ييجى يوم وياخد باله من حبى ليه بس هو دلوقتى راح اتجوز كده بكل بساطة مع ان مالك كان دايما يقولى انه رافض الجواز ومش عايز يتجوز ابدا ايه اللى خلاه يغير رأيه دلوقتى ويتجوز”
نظرت لها شيرى وتساءلت :
– :” هو انتى شفتى مراته يا ماهى ”
قالت ماهيتاب بإستنكار :
–:” ايوة بت كده باين عليها فلاحة مش عارفة جابها من اى مصيبة لاء وكمان تطلع صاحبة اخته فى الكلية وطلعت طالبة عنده فى سنة أولى”
مطت شيرى شفتيها وقالت:
–:” دى باين عليها انها صغيرة بقى”
ردت ماهيتاب قائلة بغيظ :
– :” هو ده اللى لفت نظرك انها صغيرة مش انه ازاى ميبصش لواحدة زى انا بنت الاكابر واللى الكل بيحسدنى على جمالى وكتير بيتمنوا بس ان ابصلهم بصة واحدة بس ”
لوت شيرى ثغرها وهى تقول:
–:” خلاص اديكى عرفتى انه فقرى وبيحن لاصله دايما سيبك منه بقى وياريت لو تفسخى خطوبتك من أخوه أهو تكونى أرتاحتى ومتكسريش قلب مالك هو ملوش ذنب فى جنانك ده”
