هواها متيم لسماح نجيب 5

فرآته ليان وشهقت بصوت مسموع :
– حتى أنت يا باسم بتسرق الفشار بتاعى

فحاولت ترك مكانها لتأخذه منه ، فتعثرت حركتها ، فضحكت رهف بصوت مسموع وهى تقول:
– عايزة عشرة يشدوكى أحسن خليكى كده زى السلحفة اللى نايمة على ضهرها هات يا باسم الطبق ناكله هى على ما تفكر تقوم هنكون الفجر

رأى باسم ملامح وجه شقيقته تنكمش وتمط شفتيها كأنها على وشك البكاء ، فناولها الطبق وهو يقول:
– خلاص يا حبيبتى خدى الطبق أهو ومتزعليش

أخذته منه ليان ونظرت إليهما وهى تقول بغيظ :
– اه يا جزم صبركم عليا بس أولد وهطلع اللى بتعملوه فيا ده على عينيكم

خرجت منى من المطبخ وهى تحمل أطباق الفشار التى أعدتها لرهف وباسم ، فناولت كل منهما طبقه وهى تقول:.
– خدوا الفشار أهو وسيبولها الطبق بتاعها ومحدش يضايقها

تبسمت ليان على قول والدة زوجها ، فأهدتها قبلة بالهواء وقالت :
–تسلميلى يا ماما منى عايزة اقوم أبوسك بس الظروف بقى

ضحكوا جميعهم على قولها ، فرأت منى ولديها عادوا من العمل ، فنهضت هى ورهف لإستقبالهما كالعادة ، فشدت ليان رهف من مرفقها وهى تقول :
– بت يا رهف عايزة لبان فراولة نفسى هفتنى عليه مش عارفة ليه جايز الوحم

ردت رهف قائلة:
– وحم إيه يا ليان دلوقتى دا انتى احتمال تولدى وأنتى قاعدة دلوقتى ، دا مش وحم دى طفاسة يا روحى

ضربتها ليان على ذراعها برفق وهى تقول:
– يلا أمشى مش عايزة منك حاجة

تبسمت رهف على أفعال ليان ، فهى صارت شرهة جدا بتناول الطعام والحلوى ، ولكنها أسرعت لحقيبتها التى تجعلها بمكان قريب منها دائماً وأخرجت لها ما كانت تريده ، فناولتها علكتها المفضلة ، فتبسمت لها ليان وأخذتها منها وبدأت مضغها بتلذذ
____________
بعد مرور أسبوع وبمنزل والد نسرين كانت الأجواء تعمها السعادة والزغاريد تصدح بالمنزل ، فاليوم هو يوم خطبة مالك ونسرين ، فبعد إخباره لعائلته بنيته بالزواج منها ، ذهب مع شقيقه ووالدته لطلب يدها ، وبعد موافقتها وموافقة والديها ، قررا عمل حفل الخطبة بمنزل أبيها

وضعت نسرين الخاتم الذهبى بيدها اليمنى وهى لا تصدق أنها أصبحت خطيبته الآن ، فلابد أنها تحلم ، ولكنها لا تريد أن تستيقظ إن كان هذا حلماً